ភ្នំពេញ៖ ប្រធានគណៈកម្មការប្រតិបត្តិនៃក្រុមហ៊ុន CP All នៅប្រទេសថៃលោក Korsak Chairasmisak បានជម្រាបជូនសម្ដេចតេជោថាលោកនឹងផ្ដល់អាហារូបករណ៍ដល់និស្សិតកម្ពុជាសិក្សាថ្នាក់បរិញ្ញាបត្រ និងថ្នាក់បច្ចេកទេស ចំនួន ២០ និងផ្ដល់ការសិក្សាដល់កុមារកម្ពុជា ចំនួន ៣០នាក់ ទៅរៀនពីល្បែងអុកចិន នៅប្រទេសថៃផងដែរ។

លោកបានបញ្ជាក់ចំពោះសម្ដេចតេជោ ហ៊ុន សែន ក្នុងជំនួបមួយនៅវិមានសន្តិភាព នៅព្រឹកថ្ងៃទី១៦ ខែសីហា ឆ្នាំ២០២២នេះ ដោយថា រាល់ការចំណាយទាំងអាហារូបករណ៍ និងការសិក្សាល្បែងអុកចិន ទាំងអស់គឺលោកជាអ្នកធានារ៉ាប់រង។

ជំនួយការសម្ដេចតេជោគឺលោក អ៊ាង សុផល្លែត បានប្រាប់អ្នកយកព័ត៌មានថា៖ «ល្បែងយុទ្ធសាស្ត្រគោ គឺជាល្បែងមួយដែលមានប្រភពចេញពីប្រទេសចិនដែលមានអាយុកាលជាង ៣ពាន់ឆ្នាំមកហើយ ហើយលោកក៏ជាអ្នកបង្រៀននូវល្បិចយុទ្ធសាស្ត្រនេះ»។

សម្តេចតេជោ ហ៊ុន សែន បានថ្លែងអំណរគុណដល់លោក Korsak ដែលបានផ្ដល់អាហារូបករណ៍និងផ្ដល់ឱកាសដល់កុមារកម្ពុជាបានទៅរៀនសិក្សាល្បែងយុទ្ធសាស្ត្ររបស់ចិននេះ។ សម្ដេចតេជោបានជំរុញឲ្យលោក Korsak បន្តពិភាក្សាកិច្ចការនេះជាមួយនឹងរដ្ឋមន្ត្រីក្រសួងអប់រំបន្តទៀត។

ល្បែងអុក Go របស់ចិនគឺជាហ្គេមក្តារយុទ្ធសាស្ត្រសម្រាប់អ្នកលេងពីរនាក់ដែលគោលបំណងគឺដើម្បីឡោមព័ទ្ធទឹកដីច្រើនជាងគូប្រកួត។ ល្បែងនេះត្រូវបានបង្កើតឡើងនៅក្នុងប្រទេសចិនជាង ២ ៥០០ ឆ្នាំមុន ហើយត្រូវបានគេជឿថាជាហ្គេមក្តារដែលចំណាស់ជាងគេបំផុតដែលបន្តលេងរហូតមកដល់បច្ចុប្បន្ន។ បច្ចុប្បន្នសហព័ន្ធអន្តរជាតិគោមានប្រទេសជាសមាជិកចំនួន៧៥៕ 

^{PHOTO: KOK KY}